Қазақстан Ресейден импортталатын автомобильдер үшін утильалым мөлшерін арттыруды жоспарлап отыр,-деп хабарлайды «Dalamedia» ақпараттық порталы.

Бұл бағыттағы тиісті бұйрық әділет органдарында тіркеуден өткен. Министрліктің түсіндіруінше, өзгеріс Еуразиялық экономикалық одақ аясында жағдайды теңестіруге және Қазақстан мен Ресей арасындағы утильалым мөлшеріндегі айырмашылықты азайтуға бағытталған.

Жаңа тәртіп бойынша тарифтер көлік санаттарына қарай белгіленіп, Ресейдегі қолданыстағы мөлшерлемелерге сәйкестендірілмек. Дегенмен ведомство нарықта бағаның күрт өсуі күтілмейтінін айтады.

Министрлік өкілдерінің мәліметінше, ресейлік көліктердің қазақстандық нарықтағы үлесі айтарлықтай жоғары емес. Сондықтан утильалым өзгерісі жалпы баға деңгейіне айтарлықтай әсер етпейді.

2024 жылы ресми сатылымдағы ресейлік автомобильдер үлесі 0,43 пайызды (883 көлік), 2025 жылы 1,31 пайызды (3088 көлік), ал 2026 жылдың алғашқы екі айында 1,62 пайызды (447 көлік) құраған.

Елге негізінен Lada (Granta, Vesta, Niva) модельдері, сондай-ақ GAZ және KAMAZ коммерциялық техникалары жеткізіледі.