Ұлытау облысының Жәйрем кентінде төрт баланы тәрбиелеп отырған әйел қатыгездікпен өлтірілді. Қылмысқа күдікті ретінде марқұммен бірге тұрған 33 жастағы азаматтық некедегі ер адам танылып отыр, -деп хабарлайды «Dalamedia» ақпараттық порталы.

Марқұм отбасының жалғыз асыраушысы болған. Ол жеке дүкен ұстап, пәтерін жалға беріп, төрт баласын, соның ішінде мүмкіндігі шектеулі қызын өсіріп отырған. Жақындарының айтуынша, күдікті жұмыс істемеген, ішімдікке салынып, әйелге жиі қысым көрсеткен. Қайғылы оқиғаға дейін әйел одан кетуге шешім қабылдағанымен, уақытша баспанасында тұруына рұқсат берген.

Оқиға күні әйел өз дүкенінде болған. Сол уақытта ер адам келіп, оған пышақпен шабуыл жасаған. Туыстарының сөзінше, әйелге бірнеше рет пышақ сұғылып, ауыр жарақаттан көз жұмған. Одан кейін күдікті өзіне қол жұмсамақ болған. Қазір ол Жезқазғандағы ауруханада жатыр.

Полиция дерегінше, бұл оқиға бойынша “аса қатыгездікпен адам өлтіру” бабы бойынша қылмыстық іс қозғалған. Күдікті медициналық мекемеде күзетпен жатыр, кейін тергеу изоляторына қамалады. Іс өңірлік полиция басшылығының бақылауына алынған.

Марқұмның туыстары әділ тергеу жүргізуді талап етіп, балаларды қамқорлыққа алу мәселесін көтеріп отыр.

Еске салайық, бұған дейін Қарағандыда да анасы мен кәмелетке толмаған қызының өлімі қоғамды алаңдатқан еді.