Колонияда жазасын өтеп жатқан Перизат Қайрат еңбекке тартылды,-деп хабарлайды «Dalamedia» ақпараттық порталы. Ішкі істер министрлігі Қылмыстық-атқару жүйесі комитетінің мәліметінше, ол мекеме ішіндегі тазалық жұмыстарына жіберілген.

Ведомство сотталған азаматшаның қызметтік бөлмелерді жинау ісімен айналысып жүргенін нақтылады. Бұған дейін, 2025 жылдың қазан айында ішкі істер министрінің орынбасары Абай Қайырбеков оның еңбекке орналастырылуы біліктілігі мен бос жұмыс орындарына байланысты шешілетінін айтқан еді. Кейін ҚАЖК мекемелерде сотталғандарға 48 түрлі мамандықты меңгеруге мүмкіндік барын, соның ішінде аспаз, тігінші, омарташы сияқты бағыттардың да қарастырылғанын хабарлаған.

Іс материалдарына сәйкес, Перизат Қайрат пандемия кезінде кең тараған «Біз Біргеміз» ұранын пайдаланып, «BizBirgemiz Qazaqstan 2030» қоғамдық бірлестігін құруға бастамашы болған. Тергеу нұсқасы бойынша, ол бірлестікті заң талаптарына сай тіркей алмағандықтан, құрылтайшылар қатарына тоғыз адамды тартып, олардың қолдарын қолдан жасатқан.

Айыптау тарапы Перизат Қайрат пен оның анасы қайырымдылыққа жиналған шамамен 3,5 миллиард теңгені мақсатсыз жұмсағанын алға тартады. Бұл қаражат мүгедек балаларға арналған орталық салуға, Газа секторына және су тасқынынан зардап шеккендерге көмек ретінде жиналған. Алайда тергеу деректерінде бұл қаржының бір бөлігі қымбат киім, сөмке, пәтер, көлік және шетелдік сапарларға жұмсалғаны көрсетіледі.

Сотталушылар өздеріне тағылған айыппен келіспей отыр. Перизат Қайрат сот барысында бұл айыптарды «тергеу болжамы» деп бағалаған. Іс жабық режимде қаралып жатыр.

Іске 50-ге жуық жәбірленуші қатысуда. Олардың арасында жеке азаматтармен қатар ірі компаниялар мен ұйымдар бар. Бұған дейін Газа секторына көмек ретінде жиналған 83 миллион теңге және басқа да қайырымдылық қаражаттарының жұмсалуы қоғамда күмән тудырған. Прокуратура жалпы шығын көлемін 200 миллион теңгеден асады деп көрсеткен.