Елордада өзін байланыс операторының қызметкері ретінде таныстырған алаяқ ірі көлемде ақша жымқырған, — деп хабарлайды «Dalamedia» ақпараттық порталы. Бұл туралы Бас прокуратура мәлімдеді.

Астана қаласының «Сарайшық» ауданында аса ірі алаяқтық дерегі тіркелді. Наурыз айында белгісіз адам жәбірленушіге хабарласып, өзін ұлттық байланыс компаниясының қызметкері ретінде таныстырған. Ол қосымша телеарналарды қосуға 30 пайыз жеңілдік барын айтып, сендірген.

Әңгіме барысында күдікті жәбірленушіні түрлі әрекеттерді орындауға иліктіріп, ақыры оның ұялы телефонына қол жеткізген. Салдарынан телефон уақытша бұғатталып, азаматтың депозиттік шотындағы 20 миллион теңге заңсыз шешіп алынған.

Аталған дерек бойынша Қылмыстық кодекстің 190-бабы 4-бөлігімен сотқа дейінгі тергеу басталды. Қазір тергеу амалдары жүріп жатыр.

Астана қаласының прокуратурасы тұрғындарды барынша сақ болуға шақырады. Мамандар бейтаныс адамдардың телефон арқылы айтқан нұсқауларын орындамауға, құпия кодтар мен банк картасының деректерін, жеке мәліметтерді ешкімге бермеуге кеңес береді.