Іс материалдарына сүйенсек, 30 жастағы қала тұрғыны өзін “танысы бар адам” ретінде таныстырып, азаматтарға ірі компанияға жұмысқа орналастырып беру, жер телімін және пәтерді арзан бағаға алып беру қызметін ұсынған. Сенімге кіру үшін нақты мерзім мен баға айтып, кей жағдайда кеңселердің маңында кездесулер ұйымдастырған.

Осылайша, ол адамдардан қомақты қаражат алған. Ақша қолма-қол да, түрлі есепшоттарға да аударылған. Кейбір жағдайда қаражат оның жақындарының атына тіркелген есепшоттарға түскен. Сомалар бірнеше миллион теңгеге дейін жеткен. Мәселен, бір жәбірленушіге әуежай маңынан жер алып беремін деп уәде беріп, 35 миллион теңгеден астам қаржы алған. Ал тағы бір азамат пәтерді арзанға аламын деп сеніп, шамамен 6 миллион теңге берген.

Сондай-ақ, күдікті ірі компанияға жұмысқа орналастыруды да “табыс көзіне” айналдырған. Мысалы, сатылым менеджері қызметіне тұрғызу үшін шамамен 4 миллион теңге, ал кеңсе қызметкері үшін 500 мың теңге сұраған.

Сот барысында айыпталушы кінәсін толық мойындап, алған қаражатты жеке қажетіне жұмсағанын айтқан. Іс қаралғанға дейін ол келтірілген шығынды толық өтеген. Тоғыз жәбірленуші оған қатысты талап-шағымы жоқ екенін білдіріп, бас бостандығынан айырмауды сұраған.

Сот оны ірі және аса ірі көлемдегі алаяқтық жасағаны үшін 5 жылға бас бостандығынан айыруға үкім шығарған. Алайда амнистияға байланысты жаза мерзімі қысқартылып, шартты жазаға ауыстырылды. Соның нәтижесінде сотталушы сот залынан босатылды.