Ресейдің Ленинград облысында қазақстандықтардың қатысуымен болған жаппай төбелеске байланысты бірнеше адам қамауға алынды, тағы үш азамат тергелуде, — деп хабарлайды «Dalamedia» ақпараттық порталы.

Қазақстан Сыртқы істер министрлігінің мәліметінше, 28 наурыз күні Санкт-Петербургтегі Бас консулдық қызметкерлері Усть-Луга вахталық кентінде жұмыс істейтін Қазақстан азаматтарымен кездескен. Мамандар кездесу барысында тұрмыстық жанжал салдарынан ұсталған азаматтармен де сөйлескен.

Ведомствоның хабарлауынша, тәртіпсіздікке бастапқыда бірнеше жүз адам қатысқан. Оқиғадан кейін әртүрлі елдерден 30-дан астам адам ұсталған, кейін олардың көпшілігі босатылған. Кейбір Қазақстан азаматтарына әкімшілік құқықбұзушылық бойынша 10 тәулікке қамау туралы сот шешімі шығарылған. Қазір үш қазақстандық тергеу жұмыстарына тартылған. Барлық азаматтарға консулдық-құқықтық көмек көрсетілуде, зардап шеккен немесе медициналық көмекке мұқтаж адамдар жоқ.

СІМ хабарлауынша, Усть-Лугадағы кездесуге жұмысшылар мен учаске прорабтары, Ресейдің құқық қорғау органдары, жұмыс беруші компания және күзет агенттігінің өкілдері қатысқан. Онда болған жағдай конструктивті талқыланып, мұндай оқиғалардың қайталанбауы үшін шаралар қарастырылған. Қазіргі таңда кенттегі жағдай тұрақты, тергеу амалдары жалғасып жатыр.

Әлеуметтік желідегі видеоматериалдардан бір топ адамның арасына көлік кіріп кеткен сәт, сондай-ақ күзет қызметкерлерінің адамдарды күштеп көлікке отырғызып жатқаны көрінеді. Пайдаланушылардың пікірінше, жанжал қазақстандықтар мен жергілікті күзет қызметкерлері арасындағы келіспеушіліктен басталған.

Еске салсақ, бұл төбелес 2026 жылғы 26 наурызда Усть-Луга вахталық кентінде болған. Қазақстан СІМ ресми түрде оқиғаның мән-жайын бақылауда ұстап, азаматтардың қауіпсіздігін қамтамасыз етіп отыр.