Қазақстандық жылқы етін Жапония нарығына шығару мүмкіндігі қарастырылып жатыр ,-деп хабарлайды «Dalamedia» ақпараттық порталы.

«Turan» Қазақстан мал өсірушілер қауымдастығының басқарма төрағасы Жәнібек Кенжебаевтың айтуынша, бұған дейін Жапониядан келген өкілдер Қазақстанда болып, шикі жылқы етінен дайындалған өнімдерді татып көрген. Сол кезде шетелдік мамандар қазақстандық өнімнің сапасына жоғары баға берген.

Осы тәжірибеден кейін қазақстандық өндірушілер жапондық импорттаушылар және дистрибьюторлармен бірқатар келіссөздер жүргізіп, Жапонияға ет жеткізуді жолға қоюды жоспарлап отыр.

Алдағы маусым айының соңында қазақстандық делегация Жапонияның Mitsui корпорациясымен бірге Кумамото қаласына бармақ. Сол жерде жылқы етінің арнайы дегустациясы ұйымдастырылып, өнім жергілікті нарық өкілдеріне ұсынылады.

Іс-шараға ірі импорттаушылар мен дистрибьюторлар, сондай-ақ салалық қауымдастық өкілдері қатысады деп күтілуде. Олар қазақстандық ет өнімдерінің сапасымен жақын танысуға мүмкіндік алады.

Жәнібек Кенжебаевтың айтуынша, жапон тарапы қазақстандық делегацияны қабылдауға дайын және жылқы етінің сапасын жан-жақты зерттеуге қызығушылық танытып отыр.

Делегация құрамына ет өндірушілер, өңдеу кәсіпорындары, бордақылау алаңдары мен асыл тұқымды шаруашылықтардың өкілдері енеді.

Жобаны жүзеге асыруға QazTrade ұйымы мен Ауыл шаруашылығы министрлігі атсалысып жатыр. Қауымдастық өкілдері алдағы бір-екі жыл ішінде Жапония нарығын ашуға мүмкіндік бар екенін айтады.