Қазақстанда базалық мөлшерлеме өзгеріссіз қалды. Ұлттық Банк инфляцияның баяулағанына қарамастан, негізгі ставканы жылдық 18 пайыз деңгейінде қалдыру туралы шешім қабылдады. Реттеуші бұл қадамды баға өсімінің әлі де жоғары деңгейде сақталуымен түсіндірді,-деп хабарлайды «Dalamedia» ақпараттық порталы.

Ресми дерекке сәйкес, елдегі инфляция біртіндеп бәсеңдеп келеді. Наурыз айында жылдық көрсеткіш 11 пайызды құрады, ал ақпанда бұл деңгей 11,7 пайыз болған. Бағаның өсуі негізінен азық-түлік, тауарлар мен қызмет көрсету салаларында байқалғанымен, қарқыны аздап төмендеген.

Мамандар мұны қатаң ақша-несие саясаты, теңгенің салыстырмалы тұрақтылығы және халық тарапынан несиеге сұраныстың азаюымен байланыстырады. Бұған қоса, коммуналдық қызметтер мен жанармай бағасының уақытша тұрақтандырылуы да әсер еткен.

Айлық инфляция да баяулаған: наурызда 0,6 пайыз болса, ақпанда 1,1 пайыз деңгейінде болған. Дегенмен баға өсімі толық тоқтамағандықтан, Ұлттық Банк базалық мөлшерлемені төмендетуге әлі ерте деп санайды. Халық арасында инфляциялық күтулер де жоғары деңгейде сақталып, шамамен 14,6 пайызды көрсетіп отыр. Сарапшылардың болжамынша, жыл соңына қарай инфляция 10 пайыз шамасына дейін түсуі мүмкін.

Сыртқы экономикалық факторлар да жағдайға ықпал етіп отыр. Әлемдік нарықтағы, әсіресе Таяу Шығыстағы геосаяси ахуал энергия мен азық-түлік бағасына қысым түсіріп отыр.

Сонымен қатар ел экономикасы өсім көрсетіп келеді. Алғашқы үш айдың қорытындысы бойынша ЖІӨ 3 пайызға артқан. Бұл ретте құрылыс, сауда және өндіріс салаларындағы белсенділік ерекше байқалады.

Ұлттық Банк алдағы уақытта инфляция тұрақтаса, базалық мөлшерлемені төмендету мүмкіндігін жоққа шығармайды. Келесі шешім 2026 жылдың 5 маусымында қабылданады.