Қаржылық мониторинг агенттігі елімізде шамамен 140 мың азаматтың атына жалған медициналық қызмет рәсімделіп, көрсетілмеген ем-дом үшін Міндетті әлеуметтік медициналық сақтандыру қорының қаражаты заңсыз алынғанын анықтады, -деп хабарлайды «Dalamedia» ақпараттық порталы.

Аталған деректер бойынша қазір 36 қылмыстық іс тергеліп жатыр. Алдын ала есеп бойынша мемлекетке келтірілген шығын 3,5 млрд теңгеден асады.

Мәселен, Түркістан облысындағы Жетісай көпсалалы аудандық ауруханасында МӘМС аясында бөлінген қаражат іс жүзінде ешқандай қызмет көрсетпеген және тауар жеткізбеген 20-дан астам жеке кәсіпкердің есепшотына аударылған. Бұл іс бойынша мемлекетке 501 млн теңгеден астам шығын келтіріліп, екі күдікті қамауға алынды.

Сондай-ақ Астанада жеке клиника басшысы Әлеуметтік медициналық сақтандыру қорынан заңсыз қаржы алғаны үшін 5 жылға сотталды. Тергеу барысында 4,5 мыңнан астам жалған медициналық қызмет көрсету дерегі анықталып, мемлекетке 66 млн теңге шығын келген.