Қазақстандық теннисші Елена Рыбакина Әйелдер теннисі қауымдастығының live-рейтингінде екінші орынға көтерілді. Бұл — спортшының кәсіби мансабындағы ең жоғары көрсеткіші, — деп хабарлайды «Dalamedia» ақпараттық порталы Sports.kz сайтына сілтеме жасап.

Бұл нәтиже АҚШ-та өтіп жатқан BNP Paribas Open турнирінің ширек финалынан кейін тіркелді. Онда спортшы америкалық Джессика Пегуланы жеңген еді. Қазақстандық теннисші қарсыласын 6:1, 7:6 есебімен ұтып, жарыстың келесі кезеңіне жолдама алды.

Ал рейтингтің екінші сатысында тұрған польшалық Ига Швёнтек украиналық Элина Свитолинаға жол беріп, турнирмен қош айтысты.

Қазіргі live-рейтинг бойынша, Рыбакинаның қоржынында 7523 ұпай бар. Ал көш басында 10415 ұпаймен беларусьтік теннисші Арина Соболенко тұр.

Айта кетейік, Елена Рыбакина «Үлкен дулыға» турнирлерінде екі мәрте жеңіске жеткен. Ол 2022 жылы Wimbledon Championships жарысында топ жарса, 2026 жылы Australian Open турнирінде де чемпион атанған.