Қытайда автомобильдердегі жасырын есік тұтқаларын қолдануға шектеу қойылды. ҚХР Өнеркәсіп және ақпараттық технологиялар министрлігі бұл бағытта жаңа ұлттық қауіпсіздік стандарты бекітілгенін мәлімдеді.

Жаңа талаптарға сәйкес, 2027 жылдың 1 қаңтарынан бастап жүксалғышты қоспағанда, көліктің әрбір есігі сыртынан да, ішінен де механикалық түрде ашылатын болуы тиіс.

Министрлік мұндай шешімнің басты себебі – төтенше жағдай кезінде электронды жүйелер істен шығып, жолаушылар көлікте қамалып қалу қаупі бар екенін атап өтті.

“Технологиялық даму үрдістеріне сай қауіпсіздік талаптары әзірленді. Бұл автомобильдерді жобалау барысында қорғаныс деңгейін арттыруға мүмкіндік береді”, – делінген ресми хабарламада.

Сондай-ақ құжатта сыртқы есік тұтқасы мен көлік шанағы арасында белгілі бір арақашықтық болуы қажеттігі көрсетілген. Бұл өлшем қолғап киген адамның қолына ыңғайланып есептелген. Сонымен қатар салонда есікті қолмен ашу жолын түсіндіретін белгілер немесе суретті нұсқаулықтар міндетті түрде орнатылуы тиіс.

Ережелер 2027 жылдан бастап жаңа модельдер үшін бірден күшіне енеді. Ал қазір сатылып жатқан көліктерге бұл талаптар бірден қолданылмайды. Енді өндірушілерге бейімделу және өзгерту үшін 2029 жылдың қаңтарына дейін уақыт беріледі.

China Daily дерегінше, жаңа стандарт нарықтың үлкен бөлігін қамтиды. Себебі Қытайда ең көп сатылатын 100 электромобильдің шамамен 60 пайызында жасырын тұтқалар бар. Олардың қатарында Nio ES8, Li Auto i8, Xiaomi YU7 және XPeng P7 модельдері аталады.