Tesla компаниясы электромобильдер желісін қысқартып, адамтектес Optimus роботтарын өндіруге басымдық бермек. Бұл туралы компания басшысы Илон Маск инвесторлармен өткен қоңырауда мәлімдеді.

Оның айтуынша, Tesla келесі тоқсанда Model S седаны мен Model X кроссоверінің өндірісін тоқтатуды жоспарлап отыр. Калифорниядағы Фримонт зауыты осы модельдер орнына Optimus роботтарын шығаруға қайта жабдықталады.

Бұл шешім Tesla тарихында алғаш рет жылдық табыс төмендеген кезеңмен тұспа-тұс келіп отыр. Масктың сөзінше, 2025 жылы компанияның жалпы табысы 3%-ға азайған, ал соңғы тоқсандағы пайдасы 61%-ға құлдыраған.

Сонымен қатар, Tesla 2 млрд долларды Маскқа тиесілі xAI жасанды интеллект стартапына инвестицияламақ. Алдағы жылы компания шығындарын шамамен 20 млрд долларға арттыруды көздеп отыр.

Сарапшылар Tesla-ның бұл қадамын электромобиль модельдерінің ескіруімен және компанияның роботакси мен ІІ секілді жаңа бағыттарға бет бұруымен байланыстырады. Осы жаңалықтар аясында Tesla акциялары биржадан тыс саудада шамамен 2%-ға өсті.