Испанияда жоғары жылдамдықпен жүретін жолаушылар пойыздарының соқтығысуы салдарынан қаза тапқандар саны 39 адамға жетті. Тағы 100-ден астам адам түрлі деңгейде жарақат алған, олардың бірқатарының жағдайы ауыр деп бағаланып отыр.
Қайғылы оқиғаға байланысты елде үш күндік ұлттық аза тұту жарияланды.
Еске салсақ, апат 18 қаңтар күні Испанияның Адамуз қаласы маңында орын алған. Алдын ала мәліметтерге сәйкес, жоғары жылдамдықтағы жолаушылар пойызы рельстен шығып кетіп, қарсы бағытта келе жатқан басқа пойызбен соқтығысқан.
Бұл оқиға Испанияда соңғы бірнеше онжылдықта тіркелген ең ірі теміржол апаты ретінде бағаланып отыр. Құзырлы органдар апаттың себеп-салдарын анықтау үшін тергеу жұмыстарын бастады.
Айта кетейік, бұған дейін де Испанияда ауыр теміржол апаты болған. 2013 жылдың 24 шілдесінде ел аумағында орын алған жол апатынан 79 адам қаза тауып, 140-тан астамы жарақат алған еді.
DALAMEDIA admin
Бүгін, 19:01
Әлем