Германияда Рождество мерекесін пайдаланған қаскөйлер банктің қоймасына кіріп, ірі көлемде ақша мен бағалы заттарды тонап кеткен. Белгілі деректерге сенсек, шығын көлемі шамамен 10 миллион еуроны құрайды.

Оқиға Гельзенкирхен қаласындағы Sparkasse банк бөлімшесінде болған. Ұрылар ғимараттың қалың бетон қабырғасын бұрғылап тесіп, ішіндегі бірнеше сейф жәшігін түгелдей алып шыққан.

Айта кетейік, Германияда Рождество қарсаңында, яғни 24 желтоқсан кешінен бастап көптеген дүкендер мен банк бөлімшелері жабылады. Осы жағдайды пайдаланған қылмыскерлер ұзақ уақыт бойы еш кедергісіз әрекет еткен. Полиция қоймадағы тесікті тек 29 желтоқсан күні таңертең, өрт дабылы іске қосылғаннан кейін ғана байқаған.

Оқиғадан кейін ондаған ашулы клиент банк алдына жиналып, ішке кіргізуді талап еткен.

Оның айтуынша, ол бұл сейфті 25 жылдан бері пайдаланып келген және зейнетке арналған жинағын сонда сақтаған. Тағы бір азамат банктік жәшікті отбасының қолма-қол ақшасы мен әшекей бұйымдарын сақтау үшін қолданғанын жеткізді.

Полиция өкілдерінің мәліметінше, сенбі күні кешке куәгерлер көрші көпқабатты автотұрақта бірнеше ер адамның үлкен сөмкелерді көтеріп бара жатқанын көрген. Ал дүйсенбі күні таңертең гараждан бетперде киген адамдар отырған қара түсті Audi RS 6 көлігі шығып кеткені тіркелген.

Тәртіп сақшылары көліктің нөмірі Ганновер қаласында ұрланған автокөлікке тиесілі екенін анықтады. Қазіргі уақытта қылмысқа қатысы бар тұлғаларды іздеу жұмыстары жүргізіліп жатыр.