Президент Қасым-Жомарт Тоқаевтың тапсырмасына сәйкес, Қазақстан Иранға гуманитарлық көмектің ірі партиясын жіберді,-деп хабарлайды «Dalamedia» ақпараттық порталы. Жүк теміржол арқылы жеткізіліп, тапсыру рәсімі Серахс станциясында өтті.

Гуманитарлық көмек KazAID агенттігінің үйлестіруімен, Сыртқы істер министрлігі, Төтенше жағдайлар министрлігі және Денсаулық сақтау министрлігінің бірлескен жұмысы нәтижесінде жөнелтілген.

Жалпы көлемі 30 вагоннан тұратын жүк құрамында күнделікті тұтынуға қажетті азық-түлік өнімдері бар. Атап айтқанда, консервіленген ет, қант, ұнмен қатар дәрі-дәрмек пен медициналық бұйымдар да қамтылған. Көмек Тегеранға жеткізіліп, жергілікті мекемелер арқылы таратылатын болады.

Қазақстанның Ирандағы елшісі Оңталап Оңалбаев бұл елді Қазақстанның Таяу Шығыстағы маңызды серіктестерінің бірі ретінде атап өтті. Оның айтуынша, қиын сәтте қолдау көрсету – елдер арасындағы өзара сенімді күшейтетін маңызды қадам.

«Достық сын сағатта білінеді. Қазақстан Иран халқына түрлі кезеңдерде әрдайым қолдау білдіріп келеді», – деді дипломат.