Қазақстанның сыртқы істер министрі Ермек Көшербаев Иранның сыртқы істер министрі Аббас Аракчимен телефон арқылы сөйлесті — деп хабарлайды «Dalamedia» ақпараттық порталы.

Ведомство мәліметінше, 26 наурызда өткен әңгіме барысында тараптар Орта Шығыс өңіріндегі қазіргі жағдайды талқылап, екіжақты ынтымақтастықтың өзекті мәселелері бойынша пікір алмастырды.

Сөйлесу барысында Ермек Көшербаев ирандық әріптесіне Қазақстан бейбіт келіссөздерді Түркістан қаласында өткізуге дайын екенін жеткізген. Ведомствоның хабарлауынша, бұл ұсыныс бұрын Қазақстан Президенті Қасым-Жомарт Тоқаев тарапынан айтылған еді.

Сонымен қатар, тараптар екіжақты қатынастар бойынша диалогты жалғастыруға уағдаласты.

Еске салса кетейік, 21 наурызда Мемлекет басшысы Түркістан облысына жұмыс сапарымен барып, аймақ тұрғындарымен кездесуде Қазақстанның Орта Шығыс өңіріндегі күрделі жағдайда делдалдық рөлді көздемейтінін, бірақ бейбіт келіссөздер өткізуге өз алаңын ұсынуға дайын екенін атап өткен.

22 наурызда Ақорда хабарламасына сәйкес, Қазақстан мен Иран президенттері мерекелік хабарламалармен алмасып, бауырлас халықтардың бірлігін нығайтуға және Орта Шығыста тұрақтылық орнатуға тілектестік білдірген.