АҚШ президенті Дональд Трамп Fox News арнасына берген сұхбатында Иранның мұнай инфрақұрылымына ықтимал соққы жасалуы мүмкін екенін айтып, оған дейін шамамен үш күн уақыт қалғанын мәлімдеді ,-деп хабарлайды «Dalamedia» ақпараттық порталы.

Трамптың сөзінше, Иранмен арадағы шиеленіс жақын күндері аяқталуы мүмкін және бұл жағдайда АҚШ айқын басымдыққа ие болып, “ірі жеңіске жетеді”.

БАҚ мәліметтерінде америкалық президенттің жаһандық жағдайға әсер ететін “жою таймері” іске қосылғаны да айтылған.

Сонымен қатар ол Қытайдың Иранға белгілі бір деңгейде қолдау көрсетуі мүмкін екенін тілге тиек етті. Дегенмен бұл көмекті ауқымды деп бағаламады. Трамптың айтуынша, АҚШ Украинаға көрсетіп отырған қолдау көлемі әлдеқайда жоғары.

Сұхбат барысында журналистер АҚШ пен Иран арасындағы келіссөздердің жайын да сұраған. Бұған жауап берген Трамп кейбір кездесулерге қатысу үшін тым ұзақ ұшулар қажет екенін айтып, мұндай тәжірибеден бас тартқанын жеткізді. Оның сөзінше, енді мұндай келіссөздер телефон арқылы жүргізілмек.

Сондай-ақ ол Пәкістан басшылығымен байланысқа қатысты пікір білдіріп, оларды құрметтейтінін атап өтті. Алайда ұзақ сапармен кездесуге барудың тиімсіз екенін айтып, “егер сөйлескісі келсе, бізге келсін немесе телефон шалсын” деді.

Трамптың айтуынша, қазіргі таңда тараптар қорғалған байланыс желілері арқылы да сөйлесе алады, бірақ ол мұндай жүйелердің толық қауіпсіздігіне күмән келтіретінін де жасырмады.