АҚШ Таяу Шығысқа қосымша әскер жөнелтті , — деп хабарлайды «Dalamedia» ақпараттық порталы.

Reuters агенттігінің мәліметінше, АҚШ армиясының 82-ші әуе-десанттық дивизиясының мыңдаған сарбазы Таяу Шығысқа аттанған. Бұл деректі америкалық екі ресми тұлға растаған.

Бұл әскер бұған дейін аттанған теңіз жаяу әскерлері мен арнайы операция күштерін толықтырады. Соңғы демалыс күндері аймаққа шамамен 2,5 мың морпех жеткен. Қосымша күштердің құрамында дивизия штабы, материалдық-техникалық қамтамасыз ету бөлімдері және бір жауынгерлік бригада бар.

АҚШ президенті Дональд Трамп Иранға қатысты әскери әрекеттердің келесі қадамдарын қарастырып жатқанын мәлімдеді. Бұған дейін Вашингтон Харк аралын бақылауға алу мүмкіндігін де қарастырған. Сондай-ақ АҚШ Иран аумағында құрлық әскерін орналастыруды да ойластырған. Мұндай жағдайда әскери күштер ел аумағында ұзақ уақыт қалуы мүмкін.

Трамптың айтуынша, АҚШ пен Иран арасында келіссөздер жалғасып жатыр. Дегенмен ол Ормуз бұғазы ашылмаған жағдайда мұнай нысандары мен электр станцияларына соққы жасалуы мүмкін екенін ескерткен.