Ұлыбританияда терроризм үшін сотталған Шахид Батт Бирмингем қалалық кеңесіне өтетін жергілікті сайлауға тәуелсіз кандидат ретінде тіркелді.

Батт 1999 жылы Ұлыбритания консулдығын, англикан шіркеуін және Йемендегі қонақүйді жаруды жоспарлағаны үшін 5 жылға сотталған. Тергеу мәліметінше, ол радикалды уағызшы Абу Хамзаның тобымен бірге Йеменге жіберілген. Сол кезеңде батыстық туристердің ұрлануы кезінде бірнеше адам, оның ішінде үш британдық қаза тапқан.

Абу Хамзаның өзі 2015 жылы Нью-Йоркте терроризм және адам ұрлау айыптары бойынша өмір бойына сотталған.

Террорлық шабуылдардың құрбандары сотталған адамның сайлауға қатысуына қатты наразылық білдіріп, мұны саяси жүйені мазақ ету деп атады.

62 жастағы Батт соңғы сұхбатында «жастық шағында қателіктер жібергенін» мойындағанымен, терроризм айыптарын жоққа шығарады. Оның айтуынша, түрмеден 2003 жылы шыққаннан кейін экстремизмге қарсы жұмыс істеп, биліктің радикалдануға қарсы бағдарламаларымен ынтымақтасқан.

Шахид Батт 7 мамырда өтетін сайлауда тәуелсіз кандидаттар альянсы құрамында Бирмингем қалалық кеңесіндегі шамамен 20 орын үшін бақ сынамақ.