Қазақстан Бельгияның жетекші университеттерімен отандық ғылымның дамуына серпін беретін бірқатар келісімдерге қол қойды. Ғылым және жоғары білім министрі Саясат Нұрбек мәлімдеді.

Министрдің айтуынша, Қазақстан Еуропа елдерімен білім және ғылым саласында ұзақ жылдарға созылған мықты байланыс орнатқан. Қазіргі таңда «Болашақ» бағдарламасы аясында мыңнан астам қазақстандық Еуропада білім алып жатыр, ал жалпы Ұлыбританияны қоса есептегенде, Еуропа елдерінде шамамен 15 мың қазақстандық студент оқиды.

Саясат Нұрбек соңғы жылдары Бельгиядағы қазақстандық студенттер саны да айтарлықтай артқанын атап өтті. Оның айтуынша, Лювен, Гент және Монс секілді беделді университеттерде қазақстандық жастар білім алып, ғылыми зерттеулермен айналысуда.

Министрдің мәліметінше, Қазақстан Президентінің Бельгияға сапары барысында Гент университетімен және Лювен университетімен маңызды келісімдер жасалған. Атап айтқанда, Астанада жасанды интеллект саласына арналған зертхана ашу, математик мамандарды даярлау және сирек металдар мен металлургия бағытында бірлескен ғылыми орталық құру жоспарланып отыр.

Сонымен қатар Қазақстан әлемдегі ең ірі ғылыми бағдарламалардың бірі – Horizon Europe бастамасына қосылмақ. Бұл бағдарламаның жалпы бюджеті 200 миллиард еуроны құрайды. Жоба қазақстандық ғылыми орталықтар мен университеттерге жаңа мүмкіндіктер ашып, еуропалық жетекші ғылыми институттармен тікелей ынтымақтастық орнатуға жол ашады.