Қазақстанда «Болашақ» халықаралық бағдарламасы аясындағы шәкіртақы мөлшерін 10–15 пайызға арттыру мәселесі қарастырылып жатыр,-деп хабарлайды «Dalamedia» ақпараттық порталы деп жаз.

Халықаралық бағдарламалар орталығы төрағасының орынбасары Абай Рахметтің айтуынша, шәкіртақы көлемі соңғы 15 жылдан бері өзгермеген. Осы уақыт ішінде инфляция өсіп, өмір сүру құны айтарлықтай қымбаттаған.

Оның сөзінше, қазіргі таңда кейбір стипендиаттар отбасымен бірге шетелге баруға мәжбүр болып, берілетін қаржы күнделікті шығынды толық жаппайтын жағдайлар да кездеседі. Әсіресе жекелеген елдерде шәкіртақы мөлшері жеткіліксіз болып отыр.

Шәкіртақы көлемі оқитын ел мен қалаға қарай өзгеріп отырады. Мәселен, Нью-Йоркте оның мөлшері шамамен 2200 доллар болса, басқа өңірлерде бұдан төмен.

Мәселені шешудің бір нұсқасы ретінде бағдарламадағы орын санын азайтып, үнемделген қаражатты шәкіртақыны көбейтуге бағыттау ұсынылып отыр. Жалпы өсім орта есеппен 10–15 пайыз көлемінде жоспарланғанымен, кейбір елдерде бұл көрсеткіш жоғары болуы мүмкін.

Айта кетейік, бұған дейін «Болашақ» талаптарына сай келмейтін үміткерлерге 7,7 миллиард теңге көлемінде шәкіртақы тағайындалғаны туралы ақпарат тараған еді.