Ғылым және жоғары білім министрі Саясат Нұрбек гранттарды қаржыландыру барысында анықталған заңбұзушылықтарға қатысты пікір білдірді — деп хабарлайды «Dalamedia» ақпараттық порталы.

Министрдің айтуынша, соңғы жылдары бұл салада 15 ірі тексеру жүргізілген. Оның бесеуі Жоғары аудиторлық палата тарапынан жүзеге асқан. Жалпы анықталған заңбұзушылықтар көлемі ондаған миллиард теңгеге жеткен.

Саясат Нұрбектің сөзінше, қаржыға қатысты нақты заңбұзушылықтар 1,7 миллиард теңгені құрайды. Оның 1,2 миллиард теңгесі мемлекетке қайтарылуы тиіс. Қазіргі таңда осы қаражатты өндіру жұмыстары жүріп жатыр. Ал Бас прокуратура жария еткен 79 және 189 миллиард теңге — рәсімдеу кезіндегі олқылықтар. Осыған байланысты Ғылым қоры мен Ұлттық ғылыми-техникалық сараптама орталығының жұмысына өзгеріс енгізуге бағытталған кешенді жоспар әзірленген.

«Үкіметке ұсынылған есепте 79 миллиард теңге көрсетілген. Сонымен бірге 189 миллиард теңгеге қатысты бөлек ұсыныс бар. Қазір әрбір дерек бойынша нақты жауап әзірленіп жатыр. Ал нақты қайтарылуы тиіс қаржылық заңбұзушылық көлемі — 1,7 миллиард теңге. Сондықтан бұл — екі бөлек ұғым», — деді министр.

Оның айтуынша, саладағы жүйелі кемшіліктерді жою жұмыстары жалғасып жатыр. Қажетті өзгерістер Парламент қарауына жолданған.