Ұлттық экономика вице-министрі Азамат Әмрин кәсіпкерлерге қайтарылмаған қосылған құн салығына қатысты түсініктеме берді, ,-деп хабарлайды «Dalamedia» ақпараттық порталы.

Оның айтуынша, 2025 жылы уақытша тоқтатылған шамамен 900 млрд теңге ҚҚС қайтарымының өзіндік себептері бар. Вице-министр мұндай шешімдер негізсіз қабылданбайтынын айтып, салық органдарының әрекетін қолдады.

Азамат Әмриннің сөзінше, ҚҚС қайтарылмай қалса, бұл белгілі бір заңбұзушылықтар болуы мүмкін екенін көрсетеді. Ол салық төлеушілер салық органдарының шешімімен келіспеген жағдайда сотқа жүгінуге құқылы екенін де атап өтті.

Сондай-ақ вице-министр ҚҚС қайтарымы әрдайым тексерістен кейін жүргізілетінін айтты. Егер салық тізбегіндегі жеткізушілердің арасында салық төлемегендер анықталса, бюджет шығынға батпас үшін қайтарым уақытша тоқтатылуы мүмкін.

Айта кетейік, бұған дейін Жоғары аудиторлық палата 2025 жылы кәсіпкерлерге қайтарылуы тиіс шамамен 900 млрд теңге ҚҚС тоқтатылғанын мәлімдеген болатын. Палата өкілі Юлия Энгель салықтық бақылау сапасының төмендегенін де айтқан еді.