Қазақстанда газбен жабдықтау саласына мемлекеттік бақылау күшейтіліп, бірыңғай жүйені басқару тәртібі жаңартылады. Мәжіліс тауарлық газды үнемдеп тұтыну және газбен жабдықтау мәселелеріне қатысты заң жобасын екінші оқылымда қабылдады, -деп хабарлайды «Dalamedia» ақпараттық порталы.

Жаңа құжатқа сәйкес, елдегі бірыңғай газбен жабдықтау жүйесіне кіретін нысандар жергілікті атқарушы органдардан ұлттық оператордың қарамағына тегін беріледі. Бұл қадам газ инфрақұрылымын басқаруды орталықтандыруға бағытталған.

Сонымен қатар, газ саласына қатысты кез келген құрылыс және жөндеу жобалары енді ұлттық оператордың келісімімен ғана жүзеге асады. Ол жұмыстардың орындалу барысын да тұрақты бақылауда ұстайды.

Заңда газ тарату ұйымдарын магистральді газ құбырларына қосу тәртібі де нақты бекітілмек. Бұдан бөлек, бір газ тарату жүйесі арқылы бірнеше ұйымның қатар жұмыс істеуіне тыйым салынатыны көрсетілген.

Жалпы, жаңа өзгерістер газ саласындағы тәртіпті күшейтіп, жүйенің тиімділігін арттыруға бағытталып отыр.