3 мамырда Грузия астанасы Тбилисиде Дүниежүзілік баспасөз бостандығы күніне орай жүздеген адам көшеге шықты, ,-деп хабарлайды «Dalamedia» ақпараттық порталы.

Наразылық акциясына қатысушылар «Мзияға бостандық» және елдің еуропалық бағытын қолдайтындарын айтып, журналистердің қауіпсіз жұмыс істеуіне жағдай жасауды талап етті. Сондай-ақ олар қамауда отырған әріптестерін босатуды сұрады.

Ұйымдастырушылардың айтуынша, елде медиа өкілдеріне қысым күшейген. Соңғы уақытта журналистерге жасалған шабуылдар мен оларға қатысты қылмыстық істер саны артқан.

Журналист Мзия Амаглобели бұл наразылықтың басты символына айналды. «Сахаров» сыйлығының лауреаты 2025 жылдың басынан бері қамауда отыр. Сот оны Батуми қаласындағы акция кезінде полиция қызметкерін шапалақпен ұрды деген айыппен екі жылға бас бостандығынан айырған.

«Шекарасыз тілшілер» ұйымының мәліметінше, Грузия баспасөз еркіндігі индексінде 180 елдің ішінде 135-орынға түскен. Ел бір жыл ішінде 21 сатыға төмендеген.

Ұйым дерегіне сәйкес, 2026 жылы әлемдегі баспасөз бостандығы соңғы 25 жылдағы ең төмен деңгейге жеткен. Қазір елдердің жартысынан көбі «қиын» немесе «өте қиын» санатына кіреді. БАҚ-қа көбіне заң мен сот жүйесі арқылы қысым жасалып жатыр.

Ал Қазақстан бұл рейтингте 149-орында тұр. Норвегия дәстүрлі түрде көш басындағы орнын сақтап қалды.