Астаналық блогер Нұргелді Кердеш Моңғолия Президенті Ухнаагийн Хүрэлсүхпен жүздесті, -деп хабарлайды «Dalamedia» ақпараттық порталы.

Блогердің айтуынша, кездесуге әкесімен бірге барған. Ол мұндай қабылдауды өз еңбегіне берілген жоғары баға ретінде қабылдағанын жеткізіп, шығармашылыққа көрсетілген қолдау қуантқанын атап өтті.

Нұргелді Кердеш желіде әзілге, отбасылық құндылықтарға және үлкенге құрмет тақырыбына құрылған видеоларымен танымал. Әсіресе әкесімен бірге түсіретін бейнелері көрерменге шынайылығымен жақын. Соның арқасында оның аудиториясы шетелге де кеңейіп келеді.

Сондай-ақ блогер Моңғолиядағы оқырмандарына сәлем жолдап, алдағы уақытта бұл елге бару жоспары бар екенін айтты. Алайда кездесудің нақты мақсаты мен онда талқыланған мәселелер туралы ресми мәлімет жарияланбады.

Айта кетейік, 21 сәуірде Астанаға мемлекеттік сапармен келген Моңғолия Президенті Ухнаагийн Хүрэлсүхті ресми қарсы алу рәсімі өткен еді. Осы сапар аясындағы бұл кездесу көпшіліктің қызығушылығын тудырды.