Тоқаев жаңа Конституцияның қашан күшіне енетінін мәлімдеді,-деп хабарлайды «Dalamedia» ақпараттық порталы.

Ғалымдарды марапаттау рәсімінде сөз сөйлеген Мемлекет басшысы елде өткен референдум нәтижесінде жаңа Ата заң қабылданғанын атап өтті. Оның айтуынша, құжат елдің барлық саласын, соның ішінде ғылымды да тұрақты дамуға бағыттайды.

Президент Конституцияның преамбуласында мәдениет, білім, ғылым және инновацияға ерекше мән берілгенін жеткізді. Бұл бағыттар енді мемлекеттің стратегиялық міндетіне айналып отыр.

Сонымен қатар Қасым-Жомарт Тоқаев Конституцияны әзірлеу мен қабылдау процесіне атсалысқан ғылыми қауымдастыққа алғыс білдірді.

Өтпелі ережелерге сәйкес, жаңа Конституция 2026 жылдың 1 шілдесінен бастап күшіне енеді. Осы уақытқа дейін барлық заңнамалар Ата заң талаптарына сәйкестендірілуі тиіс.

Президент бұл бағытта Парламент ауқымды заң шығару жұмысын жүргізіп жатқанын да атап өтті.