Қарағанды облысында құқық қорғау органдары теміржолдың жылжымалы құрамынан дизель отынын жүйелі түрде ұрлап келген қылмыстық топтың әрекетіне тосқауыл қойды.

Арнайы операцияны облыстық полиция департаментінің ұйымдасқан қылмысқа қарсы күрес басқармасы ҰҚК-нің өңірлік департаментімен және көліктегі полиция департаментінің Қарағанды–Сұрыптау желілік бөлімімен бірлесіп, көлік прокуратурасының қолдауымен жүргізді.

Полицияның мәліметінше, жедел-іздестіру іс-шаралары барысында 28 дерек анықталған. Осы қылмыстық схемаға қатысы бар деген күдікпен 17 адам ұсталды. Қазір олардың әрқайсысының рөлі мен заңсыз әрекеттерге қатыстылығы тексерілуде.

Тінту кезінде шамамен 500 келі дизель отыны, жанармай тасымалдауға арналған канистрлер, 2017 жылы Ресей ІІМ-де жоғалған деп тіркелген атыс қаруы, 26 оқ-дәрі, жеті телефон және есірткі заттары табылып, тәркіленді.

Аталған факті бойынша қылмыстық іс қозғалды. Тергеу амалдары жалғасуда.