Вьетнамның оңтүстігіндегі Фукуок аралы маңында туристер мінген серуендеу катері аударылып, салдарынан 15 адам көз жұмды, -деп хабарлайды «Dalamedia» ақпараттық порталы.

Алдын ала мәлімет бойынша, жоғары жылдамдықпен жүретін катер порттан шыққаннан кейін жағалаудан шамамен 400 метр қашықтықта апатқа ұшыраған. Ол Ан Тхой портына бағыт алған.

Катер бортында барлығы 36 адам болған. Оның 32-сі Үндістаннан келген туристер болса, төртеуі экипаж мүшелері.

Апат салдарынан 13 ер адам мен екі әйел қаза тапты. Көптеген жолаушы аударылған катердің ішінде қалып, дер кезінде сыртқа шыға алмаған.

Құтқарушылар 21 адамды судан аман алып шықты. Алайда олардың кемінде 18-і ауыр жағдайда ауруханаға жеткізілген. Қазір оқиғаның нақты себептері анықталып жатыр.