АҚШ-тың Миссури штатында орын алған қайғылы әуе апаты салдарынан борттағы барлық жолаушылар мен экипаж мүшелері қаза тапты, — деп хабарлайды «Dalamedia» ақпараттық порталы.

Оқиға жексенбі күні таңертең болған. Жеке ұшақ Батлер мемориал әуежайынан көтерілгеннен кейін әуеде белгісіз себеппен бағытын өзгертіп, Канзас-Сити қаласынан шамамен 65 миль оңтүстікте орналасқан әуе айлағы маңына құлаған.

Соққыдан кейін әуе кемесі бірден отқа оранған. Дегенмен оқиға орнына жеткен құтқару қызметі өртті көп ұзамай ауыздықтаған.

Ресми мәліметке сәйкес, апаттан 12 адам көз жұмған. Олардың 11-і парашютпен секіруге дайындалып жүрген спортшылар болса, біреуі — ұшақтың ұшқышы. Барлығы тандемдік секіруге әзірлік жүргізіп жатқан.

Жергілікті билік өкілдері қаза тапқандардың басым бөлігі алғаш рет парашютпен секіруге шықпақ болғанын атап өтті.

Қайғылы сәтті сол маңда болған кейбір туыстары да көріп қалған. Қазір апаттың нақты себебі анықталу үстінде.