Шымкент қаласының солтүстік айналма жолында аптап ыстық салдарынан бетон жол жабындысы көтеріліп, жарылған. Ақау жоспарлы тексеріс барысында анықталған ,-деп хабарлайды «Dalamedia» ақпараттық порталы.

«ҚАЖсервис» ЖШС Түркістан облыстық филиалының мәліметінше, оқиға 7 маусым күні KZ17-01 «Шымкент қаласының солтүстік айналма жолы» республикалық автожолының 2257-шақырымында тіркелген.

Мамандардың айтуынша, жолдың бүлінуіне өңірде тіркелген жоғары температура себеп болған. Соңғы күндері ауа +35–37 градусқа дейін көтеріліп, соның әсерінен бетон плиталар кеңейіп, ішкі кернеу пайда болған. Нәтижесінде жол жабыны зақымданған.

Ақау анықталғаннан кейін жол қызметтері қалпына келтіру жұмыстарына кіріскен. Қазіргі уақытта аталған учаскеде тексеру жүргізіліп, жабынның одан әрі бұзылуына жол бермеу шаралары қолға алынған.

Қауіпсіздік мақсатында жол бойына уақытша ескерту белгілері орнатылды. Жүргізушілерге жылдамдықты сақтап, белгіленген ережелерге мұқият болу ескертілді.

«ҚазАвтоЖол» ұлттық компаниясы жаз мезгілінде цемент-бетон жабындысы бар республикалық жолдардың жағдайы тұрақты бақылауда болатынын жеткізді. Компания өкілдері жүйелі тексерістер ақауды дер кезінде анықтап, жедел жөндеуге мүмкіндік беретінін атап өтті.

Айта кетейік, бұған дейін «ҚазАвтоЖол» басшылығы ақылы жолдардан түсетін қаржының қайда жұмсалатыны туралы мәлімет берген еді.