Жамбыл облысында республикалық маңызы бар ескі «Күйік» асуы жолына жүргізілген күрделі жөндеу жұмыстары аяқталып, нысан ел игілігіне берілді, -деп хабарлайды «Dalamedia» ақпараттық порталы.

12,3 шақырымды құрайтын жолдың ашылу рәсіміне облыс әкімі Ербол Қарашөкеев, ҚР Парламенті Сенаты мен Мәжілісінің депутаттары, «ҚазАвтоЖол» ҰК» АҚ басшылығы және құрылыс жұмыстарын атқарған «СинеМидасСтрой» ЖШС өкілдері қатысты.

Салтанатты жиында сөз сөйлеген өңір басшысы Жамбыл өңірінің ежелден тоғыз жолдың торабында орналасқан маңызды аймақ екенін атап өтіп, жаңартылған асудың ел экономикасы үшін айрықша мәнге ие екенін айтты.

Оның айтуынша, ескі «Күйік» асуы тек көлік қатынасының жолы ғана емес, оңтүстік пен солтүстікті, өндіріс пен нарықты, мүмкіндік пен кәсіпті жалғайтын маңызды күретамыр іспетті.

Сонымен қатар ол Мемлекет басшысы Қасым-Жомарт Тоқаевтың көлік-логистика инфрақұрылымын дамытуға ерекше мән беріп отырғанын, соның нәтижесінде ел аумағында ірі жол жобалары кезең-кезеңімен жүзеге асып жатқанын жеткізді.

Бұған дейін ұзақ жылдар бойы тұрғындар мен жүргізушілер тарапынан сынға ұшырап келген асудың жағдайы, әсіресе қыс мезгілінде қолайсыздық тудырып келген еді. Енді бұл түйткіл толық шешімін тапты.

Жоба аясында ұзындығы 12,3 шақырым жол жаңартылып, жұмыстар 10 ай ішінде аяқталған. Құрылысқа шамамен 200 адам жұмылдырылып, жұмысты «СинеМидасСтрой» ЖШС жүзеге асырған. Жобаның жалпы құны 6,9 млрд теңгені құрайды.

Шара соңында жол саласының дамуына үлес қосқан бірқатар азаматтар марапатталды.