ҚР Туризм және спорт министрлігіне қарасты Спортты дамыту дирекциясы Михаил Шайдоровтың жалақысына қатысты жағдайға түсініктеме берді, -деп хабарлайды «Dalamedia» ақпараттық порталы.

Ведомство мәліметінше, спортшыларға жалақы қолданыстағы келісімшарттар мен халықаралық жарыстарға дайындық талаптарына сәйкес төленеді. Осыған байланысты Михаил Шайдоровқа 2026 жылдың қаңтар және ақпан айларындағы еңбекақы бұрын жасалған келісімшарт негізінде толық көлемде берілген.

Дирекцияның хабарлауынша, 2026 жылдың наурыз айынан бастап Олимпиада чемпионымен жаңа келісімшарт жасау жоспарланған. Бұл шешім Миланда өткен қысқы Олимпиада ойындарында спортшының алтын медаль иеленуінен кейін қабылданған.

Жаңа құжатта келесі олимпиадалық циклге арналған дайындық пен қаржыландырудың жаңартылған тәртібі қарастырылмақ. Қазіргі уақытта келісімшарт талаптары тараптар арасында талқыланып жатыр.

Министрлік мұндай тәжірибе барлық олимпиадалық циклге дайындалатын спортшыларға ортақ екенін атап өтіп, оны мемлекеттік қаржыландыру жүйесіндегі қалыпты рәсім ретінде түсіндірді.

Сонымен қатар, мемлекет Олимпиада чемпионы алдындағы міндеттемелерін толық орындайтынын жеткізді. Атап айтқанда, Михаил Шайдоровқа 250 мың АҚШ доллары көлемінде сыйақы беру, Алматыдан үш бөлмелі пәтер табыстау және заңнамаға сәйкес өмір бойғы ай сайынғы төлем тағайындау көзделген.

Айта кетейік, бұған дейін спортшы өзі мен бапкерлеріне бес ай бойы жалақы төленбегенін айтып, мәселе көтерген болатын.