Алматы әкімдігі Олимпиада жүлдегері Михаил Шайдоровқа 120 миллион теңгеге пәтер сатып алуды жоспарлап отыр. Тиісті конкурс мемлекеттік сатып алу порталында жарияланған, — деп хабарлайды «Dalamedia» ақпараттық порталы.

Құжатқа сәйкес, сатып алу Алматы қаласы Коммуналдық инфрақұрылым және тұрғын үй инспекциясы басқармасы арқылы жүзеге асырылады. Ал конкурсты ұйымдастырушы ретінде қаланың Мемлекеттік активтер басқармасы көрсетілген.

Конкурс аясында бір ғана пәтер сатып алу қарастырылған. Нысанның құны қосылған құн салығынсыз 120 миллион теңге көлемінде белгіленген. Пәтер Алматының орталық бөлігінде, Жароков – Жандосов – Тұрғыт Озал – Абай көшелерінің аралығында орналасуы тиіс.

Техникалық талаптарға сәйкес, тұрғын үйдің аумағы 110–120,5 шаршы метр, кемінде үш бөлмелі болуы қажет. Сондай-ақ нысан 2025 жылдан ерте салынбаған, «комфорт» санатынан төмен емес деңгейде болуы шарт. Пәтер толық әрленген күйде тапсырылуы тиіс: қабырғаға тұсқағаз, 33-класты ламинат немесе керамогранит, созылмалы төбе, жылы еден, сантехника, ішкі есіктер және электронды құлыппен жабдықталған кіреберіс есік қарастырылған.

Алматы қаласы әкімдігі бұл сатып алуға қатысты түсініктеме беріп, 120 миллион теңгелік пәтердің спортшыны баспанамен қамтамасыз ету мақсатында алынатынын хабарлады. Ведомство мәліметінше, бұл шешім 2026 жылы Миланда өткен қысқы Олимпиада ойындарында жүлдегер атанған Михаил Шайдоровқа арналған.

Әкімдік мұндай қолдау «Дене шынықтыру және спорт туралы» заң аясындағы әлеуметтік кепілдіктерге сәйкес жүзеге асырылатынын атап өтті. Сондай-ақ бұл тәжірибе жоғары нәтижеге қол жеткізген спортшыларды ынталандыру және олардың ел абыройын көтерудегі еңбегін бағалау мақсатында қарастырылған.

Тұрғын үй құны нарықтағы бағаға жасалған талдау негізінде анықталған. Әкімдік өкілдері бұл шығын бюджет қаражатын тиімсіз пайдалану емес, керісінше заңмен бекітілген міндеттемелерді орындау екенін айтады. Сонымен қатар дайын әрі толық әрленген пәтер сатып алу қосымша жөндеу шығындарын болдырмауға мүмкіндік береді.

Техникалық талаптардың нақты бекітілуі де түсіндірілді. Әкімдік айтуынша, көрсетілген аудан инфрақұрылымы дамыған әрі көлік қатынасы ыңғайлы болғандықтан таңдалған. Үш бөлмелі пәтер талабы алушының мәртебесіне сай белгіленген. Ал жаңа тұрғын үй талабы сапаны қамтамасыз етуге және болашақ шығындарды азайтуға бағытталған.

Айта кетейік, бұған дейін Михаил Шайдоровқа Алматы әкімі тарапынан үш бөлмелі пәтер кілті табысталған болатын. Сондай-ақ өзге спортшылар мен бапкерлер де тұрғын үй сертификаттарымен марапатталған.