Өзбекстанмен шекарадағы «Қапланбек» өткізу бекетінде жүйелік ақауға байланысты азаматтар мен көліктердің ұзын-сонар кезегі қалыптасты, Қазақстан аумағындағы өткізу пункті қалыпты режимде жұмыс істеп тұр, жағдай Өзбекстан жағындағы «Навои» бекетінде тіркеу жүйесінің уақытша істен шығуымен байланысты болып отыр, -деп хабарлайды «Dalamedia» ақпараттық порталы.

Қазақстан ҰҚК Шекара қызметінің мәліметінше, шекарадағы ахуал Өзбекстандағы техникалық ақаудан туындаған. Соның салдарынан көрші елге өтуді күткен жолаушылар легі «Қапланбек» бекетінде жиналып қалған.

Ал Қазақстан аумағындағы өткізу пункті әдеттегідей штаттық режимде жұмысын жалғастыруда. Шекарадан өтуге ешқандай шектеу енгізілмеген.

Қазіргі уақытта екі елдің шекара қызметтері өзара байланыс орнатып, жағдайды реттеу жұмыстарын жүргізіп жатыр. Өзбекстан тарапы жүйедегі ақауды жою және өткізу бекетінің жұмысын қалпына келтіру үшін тиісті шаралар қабылдап жатқанын хабарлаған.

Мамандар азаматтарға сапар жоспарлау кезінде осы жағдайды ескеруді ескертеді.