Түркістанда қоғамдық көлікке мінген әйел автобус есігінің жабылмауы салдарынан баласымен бірге жолға құлап, ауыр жарақат алды, -деп хабарлайды «Dalamedia» ақпараттық порталы.

Оқиға 3 ақпан күні болған. Түркістан тұрғыны Лаура Досованың айтуынша, ол баласымен бірге автобусқа мінген сәтте жүргізуші есікті толық жаппаған. Көлік қозғала бастаған кезде олар тепе-теңдігін жоғалтып, сыртқа құлап кеткен.

Салдарынан әйелдің оң аяғы екі жерден сынған, денесіне 28 тігіс салынған. Қазір ол бір айдан астам уақыттан бері мүгедектер арбасына таңылып, ем қабылдап жүр. Жарақаттан бөлек, ауыр психологиялық соққы алғанын да айтады.

Зардап шеккен тұрғынның сөзінше, оқиғадан кейін оған ешкім хабарласпаған әрі кешірім де сұрамаған. Ол әділ тергеу жүргізіліп, материалдық және моральдық шығын өтелсе дейді.

Құзырлы орган мәліметінше, аталған жағдай бойынша алдымен әкімшілік іс қозғалып, кейін қылмыстық іс тіркелген. Қазір сотқа дейінгі тергеу жүріп жатыр. Ал автобус жүргізушісінің жолаушылар қауіпсіздігін сақтамағаны алдын ала анықталған.

Автобус паркі болса, сот шешімін күтетінін және соған сәйкес әрекет ететінін мәлімдеді.