Ақтөбе облысының әкімі Асхат Шахаров әкімдік ғимаратында болған өртке байланысты мәлімдеме жасап, жағдайдың толық бақылауда екенін айтты, -деп хабарлайды «Dalamedia» ақпараттық порталы.

Әкімнің сөзінше, өрт толық сөндірілген, зардап шеккендер жоқ. Ешкім медициналық көмекке жүгінбеген. Қазіргі уақытта арнайы комиссия оқиғаның шығу себептерін анықтап жатыр.

Асхат Шахаров ғимараттың тек шатыры жанғанын, ал алтыншы қабаттағы кабинеттерге келген зақым айтарлықтай емес екенін атап өтті. Оның айтуынша, соңғы жөндеу жұмыстары 2022 жылы жүргізілген.

Өңір басшысы түстен кейін мамандардың басым бөлігі өз жұмыс орындарына қайта оралатынын жеткізді. Осы уақыт аралығында мемлекеттік қызметтер онлайн форматта үздіксіз көрсетілмек.

Сондай-ақ, өрттің себебін анықтау бойынша тергеу амалдары жүріп жатыр, арнайы комиссия жұмысын жалғастыруда. Қалпына келтіру жұмыстары кезең-кезеңімен жүзеге асырылып, бұл үдеріс жеке бақылауында болатынын да айтты.