Ұлытау облысында оңалту орталығы аутизм диагнозы қойылған баланы ресми жолдама мен квота болғанына қарамастан қабылдаудан бас тартқан. Бұл туралы баланың анасы мәлім етті, – деп хабарлайды «Dalamedia» ақпараттық порталы.

Анасының айтуынша, орталықтың бас дәрігері мұндай санаттағы балалармен жұмыс істегісі келмейтінін ашық айтқан. Сондай-ақ ол өткен жылы баласының дәл осы орталықта тек ақылы негізде ем алғанын да жеткізді.

Облыстық денсаулық сақтау басқармасы бұл жағдайға қатысты түсінік беріп, жолдама рәсімдеу кезінде қателік жіберілгенін хабарлады. Ведомствоның мәліметінше, аталған оңалту орталығы мемлекеттік келісімшарт аясында мұндай қызмет түрін көрсетпейді, сондықтан пациентті қабылдаудан бас тартуға негіз болған.

Өткен жылы балаға көрсетілген қызметтер де анасының жеке өтінішімен ақылы түрде жүргізілгені айтылды.

Кейін департамент мәселенің шешілгенін хабарлап, баланың Жезқазған қаласындағы ерекше қажеттіліктері бар балаларға арналған оңалту орталығына жіберілгенін мәлімдеді. Қазіргі таңда ол ем қабылдап жатыр.

Сонымен қатар жолдама берген медициналық ұйымның жұмысына қатысты бірқатар кемшілік анықталып, тиісті ескерту жасалған. Ал орталық қызметкерлерінің әрекетіне құқықтық баға беру құзыреті өзге бақылаушы органға тиесілі екені нақтыланды.