Елімізде 270 жеке емшара кабинеті жабылды. Бұл туралы Денсаулық сақтау министрлігінің баспасөз қызметі хабарлады — деп жазады «Dalamedia» ақпараттық порталы.

Медициналық және фармацевтикалық бақылау комитеті еліміз бойынша 1900 жеке емшара кабинетіне тексеру жүргізген. Нәтижесінде 408 мекеме тиісті лицензиясыз қызмет көрсеткені анықталған.

Қатаң шаралардың арқасында 270 кабинет өз еркімен қызметін тоқтатқан. Кейбір мекемелер лицензия рәсімдеуге кірісіп, ал 116 нысан бойынша жоспардан тыс тексеру басталған.

Тексеріс барысында анықталған басты заңбұзушылықтар: лицензиясыз қызмет көрсету, санитариялық-эпидемиологиялық талаптарды орындамау, дәрілік заттарды сақтау шарттарының бұзылуы, білікті мамандардың болмауы және шұғыл көмек көрсетуге қажетті құрал-жабдықтардың жетіспеушілігі.

Бақылау нәтижесінде 147 әкімшілік хаттама толтырылып, 16 миллион теңгеден астам айыппұл салынды.