Бұл туралы Қаржы нарығын реттеу және дамыту агенттігі төрағасының орынбасары Нұржан Тұрсынханов мәлімдеді. Оның айтуынша, қазіргі тәртіп бойынша салымшылар зейнетақы қорындағы қаржысының тек жартысын ғана жеке басқаруға аудара алады. Ал ұсынылып отырған өзгеріс қабылданса, бұл шектеу алынып, жинақтың барлығын басқарушы компанияларға сеніп тапсыруға жол ашылады.

Дегенмен бұл мүмкіндік міндетті болмайды. Әр азамат өз қаражатын қалай басқаруды өзі шешеді.

Айта кетейік, зейнетақы активтерін басқару құқығы кез келген ұйымға берілмейді. Мұндай мүмкіндік тек тәжірибесі жеткілікті, қаржылық тұрғыдан тұрақты инвестициялық компанияларға ғана ұсынылады. Мамандар бұл қадам қаржыны тиімді игеруге ықпал етіп, экономиканың дамуына серпін беруі мүмкін екенін айтады.

Бұған дейін елде зейнетақы жинақтарын мерзімінен бұрын алу шегін көтеру мәселесі де көтерілген болатын.