Қытайда әйел зоодүкеннен қымбат бағаға күшік сатып аламын деп, түлкі алған,— деп хабарлайды «Dalamedia» ақпараттық порталы. 

Daily Mirror басылымының жазуынша, Шаньси провинциясында тұратын Ван есімді тұрғын жапон шпиці деп сеніп, күшікті 1,3 мың юаньға сатып алған. Алайда уақыт өте келе жануардың түр-тұлғасы өзгере бастаған. Құйрығы үлпілдеп, тұмсығы созылып, мінезі де итке ұқсамай кеткен. Ол иттің жемін жемей, мүлде үрмейтін болған. Бұған қоса, денесінен иіс шыға бастаған.

Көп ұзамай саябақта серуендеген өзге иттер бұл жануардан қашқақтап, ал адамдар оның ит емес, түлкі екенін айта бастаған. Осыдан кейін күмәнданған әйел маманға жүгінеді.

Тайюань хайуанаттар бағының қызметкері Сунь Лэтянь жануарды көргеннен кейін оның қолға үйретілген түлкі екенін растаған. Мамандардың айтуынша, уақыт өткен сайын мұндай аңның иісі күшейе береді.

Оқиғадан кейін әйел жануардың тағдырына алаңдап, оны хайуанаттар бағына тапсырған. Қазір түлкі карантинде тексерістен өтіп жатыр. Дегенмен, қызметкерлер Ванға оны кез келген уақытта барып көруге мүмкіндік бар екенін айтқан.