Астана қаласында жарияланған үндеуде 2026 жылғы 20 наурызда 20 жылдан астам тәжірибесі бар кәсіби журналист Ботагөз Омарованың Астана қалалық полиция департаментіне «әңгімелесуге» шақырылғаны айтылған. Ол бөлімшеге өз еркімен барғанымен, бірнеше сағат ішінде оның мәртебесі өзгеріп, қорғалуға құқығы бар куәгерден күдіктіге ауысқаны көрсетілген.

Әріптестерінің мәліметінше, журналист полиция бөлімінде сегіз сағаттан астам уақыт болған. 21 наурызға қараған түні өткен тергеу сотының шешімімен ол екі айға үйқамаққа алынған. Осыдан кейін оның пәтерінде тінту жүргізілгені де атап өтілген.

Журналистердің айтуынша, Омароваға нақты қай материалы бойынша айып тағылғаны жөнінде әзірге ресми ақпарат жоқ. Тек іс Қылмыстық кодекстің 274-бабы — «көрінеу жалған ақпарат тарату» бойынша қозғалғаны белгілі.