Ақтөбеде 12 наурыз күні қоқыс алаңынан сөмкеге салынған ер адамның мәйіті табылды. Аталған дерек бойынша күдікті қолға түсті, -деп хабарлайды «Dalamedia» ақпараттық порталы.

55 жастағы марқұмның денесі №38 мектеп маңындағы қоқыс контейнерлерінің жанынан шыққан. Куәгерлердің сөзінше, белгісіз біреу қалдырып кеткен сөмке бірнеше күн бойы сол жерде жатқан.

Облыстық полиция департаменті күдіктінің жеке басы анықталып, ұсталғанын мәлімдеді. Алдын ала дерекке сүйенсек, ер адамдар бірге ішімдік ішкен кезде арада жанжал туындап, соңы қайғылы жағдаймен аяқталған. Күдікті жәбірленушіге пышақпен бірнеше рет соққы жасаған.

Қазір ол уақытша ұстау изоляторына қамалды. Тергеу амалдары жүріп жатыр, өзге мәліметтер әзірге жария етілмейді.