Мемлекет басшысы Қасым-Жомарт Тоқаев әлемдегі және Таяу Шығыстағы қазіргі ахуалға тоқталып, халықаралық жағдайдың күрделене түскенін айтты,-деп хабарлайды «Dalamedia» ақпараттық порталы.

Президенттің айтуынша, соңғы жылдары әлемдік саясаттағы тұрақсыздық айқын байқалып отыр. Қазір халықаралық жағдайды сипаттағанда «турбуленттілік» сөзі саясаткерлер мен сарапшылардың сөзінен жиі естіледі.

«Тіпті экономикалық тұрғыдан дамыған, тұрақты көрінген мемлекеттердің өзі бір сәтте жаһандық қақтығысқа, ашығын айтқанда, соғысқа тартылып кетті. Бұл соғыс Каспий маңындағы мемлекетте, бізге жақын жерде тұтанды», – деді Қасым-Жомарт Тоқаев.

Президент мұндай жағдайға әлемдік саясаттағы сенім дағдарысы әсер етіп отырғанын жеткізді. Оның сөзінше, бірқатар ел көшбасшылары арасындағы сенімнің әлсіреуі және БҰҰ беделінің төмендеуі халықаралық ахуалды күрделендірген.

Сонымен қатар Мемлекет басшысы Қазақстан азаматтарын сабыр сақтауға шақырды. Оның айтуынша, қоғам түрлі арандатуға ермей, байыппен әрекет етуі керек.

Тоқаев қазіргі жағдайда елдің де өзгерістерге бейімделуі маңызды екенін атап өтті. Президенттің сөзінше, Қазақстан ұлттық мүддені қорғауды басты назарда ұстай отырып, сыртқы саясатта стратегиялық ұстамдылықты сақтайды.