Қазақстанда аймақтардың қаржылық дербестігін кезең-кезеңімен күшейту жұмыстары жалғасады. Бұл туралы Мемлекет басшысы мәлімдеді,-деп хабарлайды «Dalamedia» ақпараттық порталы.

Президенттің айтуынша, өңірлер өз бюджетін ұқыпты жоспарлап, табысын арттыруға ерекше назар аударуы керек.

«Аймақтар өз бюджетін мұқият жоспарлап, табысын арттыруға баса мән беруге тиіс. Біз жергілікті биліктің әлеуетін және аймақтардың қаржылық дербестігін біртіндеп күшейтіп жатырмыз», – деді Мемлекет басшысы.

Президенттің айтуынша, өткен жылы ауылдық округтердің бюджеті 442 миллиард теңгеден асқан. Бұл қаржының шамамен үштен бірі – елді мекендердің өз табысы. Сонымен қатар еліміздегі ауылдық округтердің орташа бюджеті 190 миллион теңгеге жеткен.

Биылдан бастап ауылдық округтер қосымша табыс көздеріне ие болады. Атап айтқанда, кең таралған пайдалы қазбаларды өндіруге, жерасты сулары мен емдік балшықтарды пайдалануға салынатын салық жергілікті бюджетке түседі.

Президенттің тапсырмасына сәйкес, Үкімет заңды тұлғалар мен жеке кәсіпкерлерге салынатын мүлік салығының бір бөлігін төртінші деңгейдегі бюджеттерге беру мәселесін де қарастырып жатыр. Бұдан бөлек, лицензиялық алымдар мен экологиялық айыппұлдардан түсетін қаражатты аймақтарға беру мүмкіндігі талқылануда.

«Бұл – өте дұрыс ұстаным. Түскен табыс, ең алдымен, сол аймақты дамытуға жұмсалуы керек. Бір сөзбен айтқанда, жергілікті жерде қордаланған мәселелерді шешу үшін мүмкіндік те, ресурс та арта түседі», – деді Президент.

Мемлекет басшысы мәслихаттарға бөлінген қаржының тиімді әрі ашық жұмсалуын қатаң бақылау міндеті жүктелетінін де атап өтті.