Атырауда құқық қорғау органдары 19 жастағы қызға жасалған қатігездік бойынша тергеу жүргізуде, — деп хабарлайды «Dalamedia» ақпараттық порталы «Ақжайық» газетіне сілтеме жасап.

Оқиға 8 наурыз күні таңертең болған. 21 жастағы қала тұрғыны Алишер бірнеше сағат бойы қызды ұрып-соғып, пышақпен жаралап, қорлаған. Кейбір эпизодтарды ол Telegram желісіндегі сторис арқылы бөліскен.

Зардап шеккен қыз денесіндегі және аяқтарындағы жарақаттармен ауруханаға жеткізілген. Дәрігерлер оған қажетті медициналық көмек көрсетті, қазіргі жағдайы анықталуда.

Атырау облыстық полиция департаменті аталмыш іс бойынша Қазақстан Республикасының Қылмыстық кодексінің 110-бабы және 147-бабы бойынша қылмыстық іс қозғалғанын мәлімдеді.

«Жеке тұлға анықталды. Тергеу барысында тиісті сот-медициналық және психологиялық сараптамалар тағайындалды. Сонымен қатар Атырау қалалық әкімшілік құқық бұзушылықтар жөніндегі мамандандырылған сотының 09.03.2026 жылғы шешімі бойынша аталған тұлға ҚР ӘҚБтК-нің 434-бабы 2-бөлімі («Ұсақ бұзақылық») және 440-бабы 1-бөлімі («Қоғамдық орындарда мас күйінде болу») бойынша әкімшілік жауапкершілікке тартылып, 30 күнге қамауға алынды», — делінген хабарламада.