Қазақстанда әйелдердің зейнетке шығу жасы 2028 жылға дейін 61 жас болып белгіленген, - деп хабарлайды «Dalamedia» ақпараттық порталы. Ерлер үшін зейнеткерлік жас 63 жас болып қала береді.

Редакциямыз Еңбек және халықты әлеуметтік қорғау министрлігіне ресми сауал жолдап, әйелдердің зейнет жасына қатысты қандай өзгерістер болатынын нақтылады.

Министрліктің мәліметінше, 2028 жылғы 1 қаңтардан бастап әйелдердің зейнеткерлік жасы кезең-кезеңімен ұлғая бастайды:

• 2028 жылы – 61,5 жасқа толғанда;

• 2029 жылы – 62 жасқа толғанда;

• 2030 жылы – 62,5 жасқа толғанда;

• 2031 жылы – 63 жасқа толғанда.

Осылайша, 2031 жылдан бастап әйелдер мен ерлердің зейнет жасында айырма болмай, екеуіне де 63 жас қолданылады.

Министрлік бұл кезеңдік арттыру зейнетақы жүйесінің тұрақтылығын қамтамасыз ету және азаматтардың құқықтарын қорғау мақсатында енгізіліп отырғанын атап өтті.