Алматыдағы Медеу мұз айдынының маңында ірі демалыс кешені бой көтеруі мүмкін, – деп хабарлайды «Dalamedia» ақпараттық порталы «Kursiv» басылымына сілтеме жасап.

Үкіметтің жоспарына сәйкес, 2029 жылға дейін Алматы тауларында туризмді дамытуға бағытталған бірнеше инвестициялық жоба іске асырылмақ. Соның ішінде «Ski & Spa Resort» туристік базасының құрылысы да бар. Жоба аясында 81 бөлмелі қонақүй, бес қонақүй коттеджі және 15 заманауи демалыс үйшігі салынбақ. Туристік кешеннің жалпы құны 11,5 миллиард теңгені құрайды.

Бұл жобаны «Sadu Development» компаниясы жүзеге асырады. Ашық деректерге сәйкес, компания кәсіпкер Ерлан Қожасбайға тиесілі. Ол Руслан Қожасбаев есімді Мәжіліс депутатының туған ағасы.

Жоспар бойынша жаңа туристік кешен Горельник ауданында, Медеу мұз айдыны мен Шымбұлақ тау шаңғысы курортының аралығында орналасады. Құрылыс жұмыстарын 2027 жылдың соңына дейін аяқтау көзделген. Компания осы аумақтағы екі жер теліміне иелік етеді. Бірінде «Ski & Spa Resort» кешені салынса, екіншісінде «Eco Resort» туристік базасын абаттандыру жұмыстары жүргізіліп жатыр.

eGov порталындағы мәліметке сәйкес, Ерлан Қожасбай бұған дейін 2004 жылғы Олимпиадада Қазақстанның еркін күрес құрамасының бапкері болған. Қазір ол қонақүй бизнесі, жылжымайтын мүлікті басқару, жалға беру және жаңартылатын энергия салаларында жұмыс істейтін 18 компанияға иелік етеді.

Сондай-ақ «Ski & Spa Resort» жобасы Қазақстан Даму Банкі арқылы 8 миллиард теңге көлемінде жеңілдетілген несие алған. Қаржы жылдық 6,5% мөлшерлемемен 12 жылға берілген. Несие бөлу туралы шешім 2023 жылы қабылданған. Ол кезде жобаның жалпы құны шамамен 13 миллиард теңге деп бағаланған.