Ұлытау облысында 8 наурыз – Халықаралық әйелдер күні қарсаңында көпбалалы аналарға біржолғы әлеуметтік көмек көрсетіледі, – деп хабарлайды «Dalamedia» ақпараттық порталы.

Өңірлік мәслихат шешіміне сәйкес, бұл мақсатқа жалпы 187 500 000 теңге қарастырылған. Мереке қарсаңында «Алтын алқа», «Күміс алқа» иегерлері, бұрын «Батыр ана» атағын алған, сондай-ақ I және II дәрежелі «Ана даңқы» ордендерімен марапатталған әйелдерге 20 000 теңге көлемінде төлем жасалмақ. Өңірде аталған санатқа жататын аналардың саны 9 375-ті құрайды.

Қазіргі таңда Ұлытау облысында әйелдер мен қыз-келіншектер саны – 110 928 адам. Бұл облыс халқының 50,7 пайызын құрайды. Аналарды қолдау мен олардың қоғамдағы рөлін арттыру – өңірдің әлеуметтік саясатындағы басым бағыттардың бірі.