Көктемгі дала жұмыстары қарсаңында шаруаларға дизель отыны нарық бағасынан 15 пайыз төмен құнмен жеткізіледі, – деп хабарлайды «Dalamedia» ақпараттық порталы.

Бұл туралы Үкімет отырысында Энергетика министрі Ерлан Ақкенженов мәлімдеді. Оның айтуынша, жыл басында Энергетика және Ауыл шаруашылығы министрліктері 2026 жылғы көктемгі егіс жұмыстарына 402 мың тонна дизель отынын бөлу кестесін бекіткен.

Шаруаларға бөлінетін жанармайдың қозғалысын ашық бақылау үшін бірқатар шара қолға алынған. Атап айтқанда, дизель отынына жеке ПИН-кодтар енгізіліп, ол арнайы түстерге боялған. Сондай-ақ электрондық шот-фактура жүйесінде дизель үшін бөлек виртуалды қойма құрылды.

Министрдің сөзінше, бұл тетіктер мұнай жеткізушілердің жанармайды операторларға нақты әрі мақсатты жеткізуін қамтамасыз етіп, оның басқа бағытқа кетуіне жол бермейді.